आरजे इर्शाद शेख
ढल्केबर, २९ असोज
समुदायस्तरमा विकास, सशक्तीकरण तथा समावेशी सहभागिता अभिवृद्धिका लागि आयोजित दुई दिने “अनुभव आदान–प्रदान तथा समुदाय परिचालन तालिम” ढल्केबरमा सफलतापूर्वक सम्पन्न भएको छ।
Support Nepal को आयोजनामा र KURVE Wustrow (जर्मनी) को सहकार्यमा सम्पन्न तालिम असोज २८ र २९ गते ढल्केबरस्थित होटल कोमलमा सञ्चालन भयो। तालिममा प्रदेश २ अन्तर्गतका विभिन्न स्थानीय तहबाट प्रतिनिधिहरूको सहभागिता रहेको थियो।
तालिममा मटिहानी नगरपालिका, धनौजी गाउँपालिका, क्षीरेश्वरनाथ नगरपालिका र बरहथवा नगरपालिका अन्तर्गतका टोल विकास संस्थाहरूका पदाधिकारीहरू र नागरिक सहायता कक्षका प्रतिनिधिहरू सहभागी थिए।
मटिहानी नगरपालिकाबाट राम जानकी र बजार टोल विकास संस्थाका १० जना पदाधिकारी तथा नागरिक सहायता कक्षका अंशु कुमार साह सहभागी थिए।
धनौजी गाउँपालिकाबाट भैरव र सलहेस टोल विकास संस्थाबाट १० जना प्रतिनिधि तथा नागरिक सहायता कक्षकी बिना मण्डल सहभागी थिइन्।
क्षीरेश्वरनाथ नगरपालिकाबाट चार टोल विकास संस्थाका ६ जना पदाधिकारी सहभागी थिए।
बरहथवा नगरपालिकाबाट दुई संस्थाबाट ३ जना पदाधिकारी उपस्थित थिए।
अनुभवको साझेदारी, नयाँ सन्दर्भमा अभ्यास
तीन वर्षअघि गठन भएका क्षीरेश्वरनाथ र बरहथवा नगरपालिकाका संस्थाहरूले तालिममा आफ्ना अनुभव, सिकाइ र सामना गरेका चुनौतीहरू साझा गरे। ती अनुभवहरू हालै गठन भएका संस्थाहरूका लागि मार्गनिर्देशन हुने अपेक्षा गरिएको छ।
कार्यक्रम संयोजकका अनुसार, “स्थानीय तहको समुन्नत विकासका लागि समुदायको सक्रिय नेतृत्व र सहकार्य अपरिहार्य छ। यस्तो तालिमले व्यवहारिक अभ्यासलाई संस्थागत गर्न र नयाँ नेतृत्व तयार पार्न महत्त्वपूर्ण भूमिका खेल्दछ।”
सहभागीहरूले तालिममा सामुदायिक परिचालन रणनीति, सहभागितामूलक योजना निर्माण, सामुदायिक सहमति निर्माण, र स्थानीय स्रोतको परिचालन जस्ता विषयमा गहन छलफल र अनुभव आदान–प्रदान गरेका थिए।
कार्यक्रममा Support Nepal की अध्यक्ष रोशना खड्का, लेखा अधिकृत मनिषा सिंह, कार्यकारिणी सदस्य गंगा प्रसाद साह, संस्थापक सरस्वती शेर्पा, महोत्तरी जिल्ला संयोजक प्रकाश ठाकुर, धनुषा जिल्ला संयोजक शत्रुध्न महतो तथा सञ्चारकर्मीहरूको पनि उल्लेखनीय उपस्थिति रहेको थियो।
