जलेश्वरटुडे समाचारदाता
महोत्तरी, ५ कार्तिक
८६ वर्षको उमेरमा शुक्रवार रामेश्वर साह लहेरीको निधन भएको छ । हिडडुल गर्न सक्ने साह शुक्रवार विहानै पानी पिउनको लागि ओछयानबाट उठ्न खोज्दा लडेका थिए । सामान्य चोटपटक लागेका साहका परिवारजनले जलेश्वर नजिकको प्रादेशिक अस्पतालमा पुरयाएका थिए ।
जलेश्वरबाट विशेष उपचारको लागि जनकपुरधाम प्रादेशिक अस्पताल ल्याए पछि त्यहाँ अवस्था राम्रै भए पनि टाउकोको सिटि स्केन गराउन लग्ने बखतमा करिब १२ बजे बिहान अस्पताल परिसरमै निधन भएको थियो । साहको जेठो छोरा पास्टर शिव शंकर साह केहि काम विशेषले भारत गएको कारण आउनमा ढिलाई भएपछि उनको अन्त्येष्ठी आइतबार गरिएको थियो । दिवंगत साहलाई इसाई धर्म र हिन्दु धर्म अनुसार अन्त्येष्ठी गरिएको थियो ।
विभिन्न ठाउँहरुबाट आएका पास्टरहरुले प्रभु येशुसँग प्रार्थना गरी दिवंगत साहको आत्माको चिर शान्तिको कामना गरेका थिए । उपस्थित ईसाइ धर्मावलम्बि तथा परिवारका सदस्यहरुले साहको परोपरकारी मन तथा पुरुषार्थको प्रसंशा गरेका थिए । कान्छो छोरा जय हनुमान साहले बुवा दुःख र सुख दुबैमा हामीहरुको साथ हुनुहुन्थ्यो बताए । स्वर्गीय लक्ष्मी साह र तारा देवीका २ सन्तान मध्ये ज्येष्ठ छोरा हुनु हुन्थ्यो ।
निजको कान्छो भाई श्री चन्द्र साह हो । केहि वर्षदेखि डायविटिज रोगबाट ग्रसित भए पनि खानपानमा ध्यान दिए पछि राम्रो अवस्थामा नै हुनु हुन्थ्यो । केहि वर्षदेखि ईसाइ धर्ममा समेत लागेपछि वहाँ अझै आफूलाई ठीक ठान्नु हुन्थ्यो । बच्चादेखि इष्ट मित्र तथा परिवारजनसँग मित्रबत व्यवहार गर्ने आफ्नो काकाको निधनले परिवारको अभिभावकत्व गुमाएको जलेश्वरटुडे दैनिक पत्रिकाको प्रकाशक तथा सम्पादक प्रा.पवन कुमार साहले बताए ।
वहाँ एक कुशल व्यवसायि,वहुभाषा भाषि,मिहिनेती,निष्ठावान,परोपकारी सफल व्यक्तित्वको हुनुहुन्थ्यो ज्येष्ठ भतिजो बम शंकर साहले बताए । साहको अन्त्येष्ठी जलेश्वर नजिकै रातो पुलको मुनि अन्तिम दागबति दु्ईटै छोराहरुले दिएका थिए । शोकाकुल परिवारलाई सहानुभुति दिन बेलुकी ईसाई धर्माबलम्बिका पास्टरहरु तथा परिवारजनले सतसँग गरी दिवंगत साहको आत्माको चिर शान्तिको लागि प्रभु येशुसँग प्रार्थना गरी वहाँको परोपकारी मन र व्यवहारको बारेमा चर्चा गरेका थिए ।
