जलेश्वरटुडे समाचारदाता
जनकपुरधाम, १८ जेष्ठ
मधेशसहित देशभर सामाजिक रुपान्तरणमा उल्लेख्य कार्य गर्दै आएको आसमान नेपालको २५औं स्थापना दिवसको अवसर पारेर सामाजिक परीक्षण–२०८१ सम्पन्न भएको छ ।
मधेश प्रदेशसहित बाग्मती, गण्डकी लगायतको प्रदेशमा समेत सामाजिक रुपान्तरणको क्षेत्रमा कार्य गरिरहेको आसमान नेपालले आउँदो जेठ २४ मा रजत जयन्ती मनाउन लागेको हो ।
शुक्रबार जनकपुरधाममा आयोजित सामाजिक परीक्षण–२०८१ कार्यक्रममा वक्ताहरुले सामाजिक रुपान्तरणमा आसमान नेपालको भूमिका अविस्मरणीय रहेको टिप्पणी गरेका थिए ।
आसमान नेपालका अध्यक्ष रामप्रवेश यादवको अध्यक्षतामा भएको कार्यक्रममा जिल्ला समन्वय समितिका प्रमुख राजनन्दन मण्डलले सामाजिक कुरीति र विकृति विरुद्ध यो संस्थाले चलाएको अभियान प्रशंसनिय रहेको बताए ।
शिक्षा, स्वास्थ्यमा पछाडि परेको मधेशका जनतालाई सचेत पार्नको लागि संचालन गरेको परियोजनाहरु प्रभावकारी रहेको उनले दावी गरे ।
मिथिलाबिहारी नगरपालिकाका नगरप्रमुख राजेन्द्र यादवले समाजमा देखिएको विकृति अन्त्य गर्न सरकारी निकायलाई आसमान नेपालले सहयोग गरिरहेको जिकिर गरे । धनुषाको पालिकाहरुमा संचालन भइरहेको परियोजनाले किशोरकिशोरीहरु प्रत्यक्ष रुपमा लाभान्वित भइरहेको उनले बताए ।
भविष्यमा पनि यस प्रकारको जनसरोकारका परियोजनाहरु संचालन गर्न उनले आह्वान गरे ।
महोत्तरीको बलवा नगरपालिकाका नगरप्रमुख रामविजय महतोले आसमान नेपालले समाज सुधारमा गरेको योगदान प्रशंसनीय रहेको बताए ।
मधेशमा अझै जनचेतनाको अभाव रहेको बताउँदै उनले आमजनतालाई सचेत पार्न आसमान नेपालले गरेको सार्थक प्रयास भविष्यमा पनि गर्दै जानुपर्नेमा जोड दिए ।
सो अवसरमा स्वास्थ्य निर्देशनालय मधेश प्रदेशका निर्देशक डा. राजीव झाले सरकारको ध्यान जान नसकेको क्षेत्रको उत्थानमा आसमान नेपालले गरिरहेको प्रयास सराहनिय रहेको बताए ।
मधेशमा मात्रै होइन, देशमै छुट्टै पहिचान बनाउन सफल आसमान नेपालले भविष्यमा आमजनता प्रत्यक्ष रुपमा लाभान्वित हुने परियोजनाहरु संचालन गर्नुपर्नेमा डा. झाले जोड दिए ।
खेलकूद तथा समाज कल्याण मन्त्रालयका उपसचिव देवकुमारी खत्रीले महिला अधिकार, प्रजनन अधिकार, बालविवाह विरुद्धको अभियानमा आसमान नेपालले गरिरहेको प्रयास प्रशंसनीय छ ।
२५ वर्षको लामो यात्रा सफलताको साथ पूरा गर्नु आफैमा प्रशंसनीय रहेकोले आगामी दिनमा पनि यो संस्थाले जनतालाई प्रत्यक्ष लाभ हुने कार्यक्रमहरु संचालन गर्नुपर्नेमा उनल जोड दिइन् ।
शिक्षा विकास निर्देशनालय मधेश प्रदेशका अधिकृत किशोरी कापरले सामाजिक रुपान्तरणमा सबै पक्षको सहयोग अपरिहार्य रहेको बताए । सरकारलाई गैरसरकारी संघसंस्थाले सहयोग गर्दा यो कार्य थप प्रभावकारी ढंगले अघि बढ्ने विश्वास उनले व्यक्त गरे ।
जिल्ला स्वास्थ्य कार्यालय धनुषाका प्रमुख उमेश यादवले शिक्षा, स्वास्थ्य, महिला अधिकार, लैंगिक समानता कायम गर्न तथा समाजिक विकृति विरुद्ध आसमान नेपालले उदाहरणीय कार्य गरेको बताए ।
स्वास्थ्य क्षेत्रमा सुधार ल्याउन सबै पक्षको सहयोग आवश्यक रहेको बताउँदै सहयोगी हातहरुसित समन्वय गरेर अघि बढ्न आफूहरु तयार रहेको यादवले बताए ।
गत वर्षको सामाजिक परीक्षणबाट प्राप्त सुझाव कार्यान्वयन गर्दै आसमान नेपालले आगामी दिनमा पनि प्राप्त सुझाव सल्लाहलाई आत्मसाथ गरेर अघि बढ्ने कार्यक्रम निर्देशक दिनेश साहले बताए । कार्यक्रममा लागूऔषधको कुलतमा लागेका किशोरहरुको लागि मनोसामाजिक परामर्श, इन्टरनेटका कारण बालबालिकामा परेको नकारात्मक प्रभाव, जलवायु परिवर्तनको क्षेत्रमा पनि परियोजना संचालन गर्नको लागि सहभागीहरुले सुझाव दिएका छन् ।
सो अवसरमा प्रधानाध्याक, विद्यालय व्यवस्थापन समितिका पदाधिकारी, महिला स्वयम्सेविका, बाल क्लवका पदाधिकारी लगायतले पनि शुभकामना मन्तव्य राखेका थिए ।
कार्यक्रममा आसमान नेपालका कोषाध्यक्ष रेखा यादव, सल्लाहकार गुरु सुवेदी, कार्यक्रम प्रबन्धक दिलिप यादव लगायत लाभग्राहीहरुको सहभागिता रहेको थियो ।
विभिन्न दातृ निकायको सहयोगमा आसमान नेपालद्वारा मधेशसहित देशभर २५ वटा परियोजना संचालित छ ।
