जलेश्वरटुडे समाचारदाता
जनकपुरधाम, २१ श्रावण
शिक्षा तथा संस्कृति मन्त्री रानीकुमारी तिवारीले एसइईको पूरक(गे्रड वृद्धि) परीक्षालाई मर्यादित बनाउन कुनै कसर बाँकी नराख्ने प्रतिबद्धता जनाएकी छन् ।
सोमबार जनकपुरधाममा आयोजित संचारकर्मीहरुसित छलफल कार्यक्रममा बोल्दै मन्त्री तिवारीले परीक्षा मर्यादित बनाउनमा सहयोगका लागि अभिभावकहरुमा समेत आग्रह गरिन् ।
परीक्षामा चिट चोरीले विद्यार्थीको भविष्य खराब भइरहेको छ, उनले भनिन्–कुनै अभिभावकले आफ्नो सन्तानको भविष्य खराब गर्न चाह्दैन् । त्यसैले परीक्षा मर्यादित बनाउनमा अभिभावकले पनि सहयोग गर्ने विश्वास छ, उनले थपिन् ।
यही साउन २३ गतेदेखि मधेशसहित सातै प्रदेशमा एसइईको गे्रडवृद्धि परीक्षा सुरु हुँदै छ ।
साउन ३१ गतेसम्म संचालन हुने ग्रेड वृद्धि परीक्षा गराउने जिम्मा संघीय सरकारले प्रदेश सरकारले दिएको छ ।
शिक्षा क्षेत्रमा सुधार ल्याउनको लागि गर्नुपर्ने कार्यहरुबारे संचारकर्मीहरुको सुझाव लिने क्रममा मन्त्री तिवारीले शिक्षा क्षेत्रमा बेथिति रहेको स्वीकार गरिन् ।
शिक्षा क्षेत्रमा सुधारको लागि संघीय र स्थानीय सरकारसित समन्वय गरेर अघि बढ्न तयार रहेको बताउँदै उनले संघीय सरकारले शिक्षा ऐन नल्याउँदा समस्या समाधान हुन नसकेको बताइन् ।
संघीय र स्थानीय सरकारबीच समन्वय गरेर अघि बढ्न समय लाग्ने भएको छ, उनले भनिन्–आफूले गर्न सक्ने कार्यहरु तत्काल अघि बढाउछु ।
आफू सेवा सुविधाका लागि मन्त्रालयमा बसेको होइन्, उनले अगाडि भनिन्–उपलब्ध श्रोतसाधनबाट काम गर्न चाहेकी छु ।
शिक्षा तथा संस्कृति मन्त्रालयका निमित्त सचिव महेन्द्र महतोको अध्यक्षतामा भएको सो कार्यक्रममा पत्रकार श्याम सुन्दर शशिले मधेशमा नीतिगत रुपमा शिक्षामा विभेद भएको बताए ।
आधारभूत तहमा कोशी प्रदेशमा २६ विद्यार्थीमा एक जना शिक्षक रहेको अवस्थामा मधेशमा ६३ जना विद्यार्थीलाई एक शिक्षकले पढाउनुपर्ने अवस्था छ । माध्यमिक तहमा अवस्था झन नाजुक छ, शशिले भने–माध्यमिक तहमा कोशी प्रदेशमा ३० जना विद्यार्थीमा एक जना शिक्षक छन भने मधेशमा ९७ जना विद्यार्थीलाई एक जना शिक्षकले पढाउनुपर्ने अवस्था छ ।
विभेदपूर्ण मांसिकताले ल्याएको शिक्षा नीतिको मारमा मधेश प्रदेश परेको छ, यसमा सुधार गर्नको लागि प्रदेश सरकारले शिक्षा ऐन ल्याएर अगाडि बढ्नुपर्ने सुझाव शशिको थियो ।
कार्यक्रममा पत्रकार हिमांशु चौधरी, अजय कुमार झा, धर्मेन्द्र झा, हदिश खुद्दार, किरण कर्ण लगायतले आ आफ्नो सुझाव दिएका थिए ।
