जलेश्वरटुडे समाचारदाता
जनकपुरधाम, १२ मंसिर
यही मंसिर १६ गते मधेशका सात वडामा हुने उपचुनावमा मधेश केन्द्रित लोकतान्त्रिक समाजवादी पार्टी (लोसपा) ले उम्मेदवारी दिएको छैन् ।
मधेश प्रदेश सरकारमा सहभागी लोसपाले उपचुनावमा उम्मेदवार उठाउन सकेको छैन् । २०७९ को स्थानीय चुनावमा प्रतिष्ठा जोगाउन नसकेपछि लोसपाले २०८१ को उपचुनावमा उम्मेदवार नै उठाएन् । धनुषाको धनुषाधाम नगरपालिका–१,
सप्तरीको डाक्नेश्वरी नगरपालिका–१ र ४, महोत्तरीको रामगोपालपुर नगरपालिका–२, रौतहटको ईशनाथ नगरपालिका–७, राजपुर नगरपालिका–६ र रौतहटकै गढीमाई नगरपालिका–८ मा उपनिर्वाचन हुन लागेको हो ।
मधेश प्रदेशमा एक निलम्बितसहित ९ जना सांसद रहेको लोसपाका सबैभन्दा बढी महोत्तरीबाट छ । महोत्तरीबाट प्रत्यक्षतर्फ तीन जना निर्वाचित छन् भने तीन जना समानुपातिक छन् ।
महोत्तरीको रामगोपालपुर नगरपालिका–२ मा हुन गइरहेको उपचुनावमा उम्मेदवारसमेत उठाउन सकेको छैन् । लोसपाबाट प्रदेश सरकारमा गएका रानी कुमारी तिवारीले शिक्षा तथा संस्कृति मन्त्रालयको जिम्मेवारी सम्हालेकी छन् । उनी विवाहपंचमीको तयारीमा व्यस्त छिन् भने पार्टीका अन्य नेताहरुले पनि संगठन कमजोर देखेर उम्मेदवार उठाउनेतर्फ चासो लिएका छैनन् ।
मधेशमा भइरहेको उपचुनावमा उम्मेदवार उठाउन नसक्नु पार्टीको त्रुटि रहेको लोसपा मधेश प्रदेशका अध्यक्ष जितेन्द्र सोनलले बताए ।
यसप्रकारको त्रुटि नहुनुपर्ने हो, प्रदेशसभा सदस्य समेत रहेका सोनलले भने–यसबारे आगामी बैठकमा छलफल हुन्छ । मधेशलाई केन्द्र मानेर राजनीति गरेपनि अघिल्लो समय लोसपाले जिल्ला, नगरदेखि प्रदेश समितिको अध्यक्षसम्म मनोनित गरेका थिए । वडा र पालिकास्तरमा लोसपाको संगठन नहुँदा चुनावबाट पछि हटेको हो ।
चुनावमै भाग नलिएपछि म्यासेज राम्रो नगएको अध्यक्ष सोनलले स्वीकारे ।
उम्मेदवार नै नउठाएपछि लोकतान्त्रिक समाजवादी पार्टी चुनावी रिंगबाट पहिला नै आउट भइसकेको छ ।
जनता समाजवादी पार्टी, नेपाल र मधेश प्रदेश सरकारको नेतृत्व गरिरहेको जनमत पार्टीले सात मध्ये ६÷६ वटा वडामा उम्मेदवारी दिएको छ ।
जसपा नेपालले रौतहटको राजपुर नगरपालिकाको वडा नं. ६ मा अध्यक्ष पदका लागि भइरहेको उपचुनावमा उम्मेदवार नै उठाएको छैन् । राजपुर–६ बाहेक अन्य सबै वडामा पार्टीका उम्मेदवार बलियो अवस्थामा रहेको जसपा नेपालका मधेश प्रदेश अध्यक्ष बालकिशोर यादवले बताए । ६ मध्ये जसपा नेपालले कम्तीमा ४ वटा वडामा जीत निकाल्ने दावी अध्यक्ष यादवले गरे ।
जसपा नेपालले २०७९ को स्थानीय चुनावमा रौतहट गढिमाई नगरपालिका–८ को अध्यक्ष जितेको थियो । उपचुनावमा ती वडाबाट जसपा नेपालले संदेश प्रसाद यादवलाई उम्मेदबार बनाएको छ । रौतहटकै इशनाथ नगरपालिका–७ बाट जसपा नेपालले शेष अब्दुल अहमदलाई उम्मेदवार बनाएको हो भने महोत्तरीको रामगोपालपुर नगरपालिका–२ बाट मो. नजामुद्दिन खानलाई चुनावी मैदानमा उतारेका छन् । धनुषाधाम–१ बाट अजयकुमार यादव, डाक्नेश्वरी–१ मा धिरेन्द्रकुमार साह र वडा नं. ४ मा देवेन्द्र प्रसाद यादवलाई उम्मेदवार बनाएको हो ।
मधेश प्रदेश सरकारको नेतृत्व गरिरहेको जनमत पार्टीले महोत्तरीको रामगोपालपुर नगरपालिकामा उम्मेदवार उठाउन सकेको छैन् ।
धनुषाधाम–१ बाट जनमतले कुशेश्वर मण्डललाई उम्मेदवार बनाएको छ ।
२०७९ को निर्वाचनमा जनमतबाट उम्मेदवारी दिएकी रामजोती देवी यादविनीले जम्मा ९ मत प्राप्त गरेकी थिइन् ।
सप्तरीको डाक्नेश्वरी–१ बाट जनमतले शैलेन्द्र कुमार साह र वडा नं. ४ बाट उदयनारायण पण्डितलाई उम्मेदवार बनाएको हो ।
रौतहटको इशनाथ–७ बाट शेष जमिरुल हक, राजपुर–६ बाट क्यामुद्दिन धुनिया र गढिमाई नगरपालिका–८ बाट सुरेन्द्र राउत कुर्मीलाई उठाएको छ ।
पार्टीले टिकट दिएको सबै उम्मेदवार अहिलेको अवस्थामा अग्रतामा रहेको जनमत पार्टी मधेश प्रदेश संसदीय दलका नेता महेश प्रसाद यादवले बताए ।
जनताको आकर्षण जनमतप्रति बढ्दै गएकोले रामगोपालपुर बाहेक सबै वडामा आफूहरु अगाडि रहेको यादवले बताए ।
अशोक राई नेतृत्वको जनता समाजवादी पार्टीले सात मध्ये दुई वडामा उम्मेदवारी दिएको छ ।
सप्तरीको डाक्नेश्वरी–४ मा जसपाले रविन्द्र राय र धनुषाधाम–१ मा अरुण सदा मुसहरलाई उठाएको छ ।
