जलेश्वरटुडे समाचारदाता
महोत्तरी, ११ भाद्र
महोत्तरीको वलवा नगरपालिकामा रातु नदीको बाँध भत्किएर सयौं परिवार डुवानमा परेका छन् भने तिनीहरुले ज्यान बचाउका लागि गुहार समेत गरेका छन् । बलबा नगरपालिका वडा नम्बर ४ स्थित तिलगढमा रातु नदीको बाँध भत्किँएर बाढी गाउँ पसेको हो । बाढी वस्ती पस्दा झण्डै नौ सय घर परिवार डुबानमा परेको महोत्तरी प्रहरीले जनाएको छ । महोत्तरीका प्रहरी प्रवक्ता डिएसपी प्रकाश विष्टले दिएको जानकारी अनुसार बाढीले एउटै वडाका विभिन्न ठाउँमा गरेर ४ सय मिटर बाँध भत्केको छ । बाढीले बस्ती डुबेपछि स्थानीयलाई सुरक्षित स्थानतर्फ लैजाने काम सुरु भएको डिएसपी विष्टले जानकारी दिए । दुई दिनदेखिको निरन्तरको वर्षाले नदिमा अत्यधिक बाढी आउँदा बाँध भत्केको स्थानीयले बताएका छन् । वर्षाले तराई मधेशको जनजीवन प्रभावित भएको छ ।
