जलेश्वरटुडे समाचारदाता
सिरहा, १८ भाद्र
नेपाल– भारत सीमापारीको जयनगर बजारमा सिरहाका एक युवकको हत्या भएको छ । सिरहाको गोलबाजर नगरपालिका ४ निपनियाँ बस्ने ४० वर्षीय दुखरण महराको हत्या भएको अवस्थामा शव फेला परेको हो ।सिरहा स्थित दशगजासंगै जोडिएको भारत बिहार मधुवनी जिल्ला स्थित जयनगर बजार नजिक धारिलो हतियार प्रहार गरी घाँटी रेटिएको र शरीरको विभिन्न भागमा गहिरो चोटपटक लागेको अवस्थामा शुक्रबार शव फेला परेको हो । महरा बिहीबार नै घरबाट पैसा लिएर मोटरसाइकल किन्न निस्केका थिए । उनका जेठो छोरा विमल महराका अनुसार घरबाट निस्किनु अघि आमासंग विवाद भएको थियो । युवकको शव फेला परेपछि उनको डायरीमा लेखिएको नम्वरको आधारमा नेपाली भएको पहिचान भएको हो । त्यसपछि भारतीय प्रहरीले नेपाल प्रहरीसंग समन्वय गरी घटना विषयमा जानकारी गराएका हुन् । उनको शव पोस्टमार्टमको लागि जयनगरकै एक सरकारी अस्पतालमा राखिएको जनाइएको छ । महराको हत्या पश्चात घर शोकमा डुबेको छ । उनको परिवारमा श्रीमती, ३ छोरा र एक छोरी रहेका छन् ।
