राकेश प्रसाद चौधरी
जलेश्वर, १२ फाल्गुण
जनकपुरलाई केन्द्रमा राखेर रामजानकीको प्रतिमासहित शुरु भएको १५ दिने मिथिला परिक्रमा आज जलेश्वर पुगेको छ ।
जलेश्वर पुगेको मिथिलाविहारीजी तथा जानकीजीको डोलालाई जलेश्वरवासीले स्वागत गरि धार्मिक नारा सहित परिक्रमा गाछी स्थित बिश्राम स्थलसम्म लगेका हुन् । बाजागाजा सहित जलेश्वर भित्राइएको रामजानकीको प्रतिमालाई परम्परा अनुसार जलेश्वर महादेवको दर्शन गराइएको छ ।
औंसीदेखि फागु पूर्णिमाको १५ दिनसम्म पदयात्रीहरू नेपाल तथा भारतको विभिन्न धार्मिक स्थानमा पुगेर पुजापाठ गर्दै रात्री बिश्राम गर्नेगर्छन् । धनुषाको कचुरीबाट मिथिलाविहारीजी तथा जनकपुरको अग्निकुण्डबाट रामजानकीको प्रतिमा सहितको डोलासहित पदयात्रीहरू जनकपुरनजिकैको हनुमानगढीमा
बिश्राम गरि दोस्रोदिनबाट पदयात्रा प्रारम्भ गरेका थिए । कलानेश्वर, गिरिजास्थान, मटिहानीहुँदै शुक्रवार साधुसन्त, नागा। सन्यासी तथा गृहस्थ आश्रमका पदयात्रीहरू जलेश्वर पुगेका हुन् । महोत्तरी जिल्लामा मटिहानी, जलेश्वर, मडै, धु्रवकुण्ड तथा कञ्चनवन विश्रामस्थल पर्दछन् । हरेक बर्ष झैं महन्थ तथा साधुसन्तहरूले कञ्चनवनमा अविर खेलेर होली प्रारम्भ भएको घोषणा गर्नेछन् ।
मिथिलामा स्नान, दान, जप, हवन गरे जन्म–जन्मसम्म सीतारामजीको अत्यन्त प्रिय पात्र रह्ने धार्मिक ग्रंथ मिथिला महात्म्यमा उल्लेख रहेको जलेश्वरका
स्थानीय विश्वनाथ साह बताउँछन् । हरेक बर्ष पदयात्रीहरू नेपालको ११ र भारतको ४ सहित १५ स्थानको १ सय ५० किलोमिटरभन्दा बढीको यात्रा गरि मिथिला परिक्रमा गर्ने गर्छन् । शनिवार पराम्परागत रुपमा परिक्रमा मडै पुगी विश्राम गर्ने छ ।
