जलेश्वरटुडे समाचारदाता
काठमाडौं, १९ असार
युनेस्कोका निम्ति नेपाल राष्ट्रिय आयोगको सदस्यमा जलेश्वर नगरपालिकाका मेयर सुरेश साह मनोनीत भएका छन् । युनेस्कोका निमित्त नेपाल राष्ट्रिय आयोगको विधान, २०३१ (संशोधन सहित) को परिच्छेद २ को दफा ३ उपदफा (२) र (३) बमोजिम आयोगको सदस्यमा मिति २०८० असार ८ को शिक्षा, विज्ञान तथा प्रविधि मन्त्री एवं युनेस्कोका निमित्त नेपाल राष्ट्रिय आयोगको अध्यक्षको निर्णयबाट जलेश्वर नगरपालिकाको नगर प्रमुख सुरेश साह ( सोनार ) लाई चार वर्षका लागि मनोनीत गरिएको छ ।
दोस्रो विश्व युद्धको संन्तापले अक्रान्त विश्वलाई आपसी शान्ति, मैत्री र विकासको माध्यमबाट समुन्नत गर्ने अभिप्रायले स्थापित संयुक्त राष्ट्र सङ्घको बहुआयामिक पहल मध्ये विश्वमा शिक्षा, विज्ञान, संस्कृति, सामाजिक तथा मानवीय र सञ्चार क्षेत्रमा अनुसन्धान, सशक्तिकरण र विकास गर्ने उद्देश्य सहित विशिष्टिकृत संस्थाको रूपमा स्थापित युनेस्को (UNESCO-United Nations Educational, Scientific and Cultural Education) संयुक्त राष्ट्र सङ्घको एउटा विशिष्ट सङ्गठन हो । यसको स्थापना सन् १९४५ नोभेम्वर १६ मा भएको हो । शुरूमा यस सङ्गठनका सदस्य ३७ राष्ट्रहरू थिए भने हाल यसका सदस्य राष्ट्रहरू १९६ पुगेका छन् ।
