ओम प्रकाश
जनकपुरधाम, २५ मंसिर
जनकपुरधाममा व्यवसायिक कुखुरा पालक किसानहरूका लागि १ दिने अन्तरक्रिया कार्यक्रम सम्पन्न भएको छ। विप्लव सिंहको अध्यक्षता र करिब पाँच दर्जन किसानहरूको सक्रिय सहभागितामा भएको उक्त कार्यक्रममा कुखुरा व्यवसायका अवसर, चुनौती र प्रविधिमुखी व्यवसायिक विकासका विषयमा विस्तृत छलफल गरिएको थियो।
कार्यक्रममा सहभागी किसानहरूले रोग व्यवस्थापन, खोरको स्वच्छता तथा व्यवस्थापन, दाना उत्पादनमा भइरहेको मूल्यवृद्धि, बजारमा देखिने मूल्यअनिश्चितता लगायतका समस्याहरू खुल रूपमा राखे। उनीहरूले कुखुरा पालन व्यवसायलाई दीगो र सुरक्षित बनाउन स्थानीय तथा प्रदेश सरकारको ध्यान आवश्यक रहेको बताएका थिए।
अध्यक्ष विप्लव सिंहले प्रदेशमा कुखुरा व्यवसाय निकै सम्भावनायुक्त प्रसारण क्षेत्र भएको बताउँदै किसानलाई प्रविधिमैत्री प्रशिक्षण, गुणस्तरीय भ्याक्सिन तथा सहज बजार पहुँच सुनिश्चित हुनुपर्ने आवश्यकता औंल्याए। खेतीपातीभन्दा छिटो आम्दानी हुने भएकाले कुखुरा पालन व्यवसायलाई व्यवस्थित बनाउन सरकारी निकायले ठोस नीतिगत सहयोग गर्नुपर्ने उनको भनाइ थियो।
पशु चिकित्सक प्रशिक्षक मोहमद सलमानले कुखुरामा हुने सामान्यदेखि जटिल रोगको पहिचान, खोप तालिका, खानेकुराको पोषण सन्तुलन, उत्पादन व्यवस्थापन तथा फोहोर व्यवस्थापनका विषयमा विस्तृत जानकारी प्रदान गरे। आधुनिक पञ्जा (क्वालिटी चेन) प्रणाली, जैव–सुरक्षा मापदण्ड, औषधि प्रयोगका सावधानी र दाना उत्पादन विधिबारे समेत व्यावहारिक सुझाव दिइएको थियो।
सहभागी किसानहरूले यस्ता कार्यक्रमले व्यवसायिक कुखुरा पालनमा नयाँ सीप, ज्ञान र आत्मविश्वास मिलेको बताउँदै आगामी दिनमा पनि निरन्तरता दिन आग्रह गरेका थिए। अन्तरक्रिया कार्यक्रममा उठाइएका सुझावहरू संकलन गरी आगामी कार्यक्रम, फिडब्याकको रुपमा लिने आयोजकले बताएका थिए।
