जलेश्वरटुडे समाचारदाता
महोत्तरी, २६ फाल्गुण
महोत्तरीको जलेश्वरनाथ मन्दिर,जनकपुरधामको कुपेश्वरनाथ लगायत देश भरीकै शिवालयहरुलाई महाशिवरात्रिको अवसरमा बेहुली झै सजाइएको छ ।
यस अवसरमा जलेश्वर,जनकपुरधाम लगायत अन्य शिवालयहरु रहेको पालिकाहरुमा कलश शोभा यात्रा समेत निकालिएको थियो ।
यस शोभा यात्रामा विभिन्न संघ संस्थाहरु तथा राजनैतिककर्मीहरुको समेत सहभागिता रहेको थियो । महाशिवरात्रिको दिन मात्र दर्शन तथा स्पर्ष गर्न पाइने महोत्तरीको जलेश्वरनाथ महादेवको महाशिवलिंग आफ्नै महत्व तथा महिमा रहेको जलेश्वर उद्योग वाणिज्य संघका महासचिव शिवचन्द्र चौधरीले बताउनुभयो ।
स्थानिय जलेश्वरनाथ मन्दिरको कमिटि सदस्यहरु,नगरका युवाहरु तथा प्रहरी प्रशासनको सहयोगमा जलेश्वरनाथको जलाशयलाई न्यून पारी श्रद्धालु भक्तजनहरुलाई वर्षमा एक चोटि दर्शन गराईन्छ । विश्वको अनेकौं ज्योतिर शिवलिंग मध्ये जलेश्वरनाथको महाशिवलिंगलाई विश्वमै ठूलो महत्वको शिवलिंग मानिन्छ भन्ने कुराको शोध रहेको छ स्थानिय पत्रकार राकेश प्रसाद चौधरीको ।
यसै गरी जनकपुरधामको शिव चौक स्थितको शिवालय,कपिलेश्वरको कपिलेश्वरनाथ शिवालय,कुवा रामपुरको कुपेश्वरनाथ शिवालय लगायत काठमाडौंको पशुपतिनाथ मन्दिरलाई सजाइएको छ । यस महाशिवरात्रिको दिन महादेवलाई जल,बेलपत्र,धतुर,भांग,अकनको फुल लगायतका सामाग्री चढाई उपबास बस्ने गरिन्छ । यसरी पुजाआजा गर्नाले भगवान शिवको असिम कृपा तथा आशिर्वाद प्राप्त हुने र अविवाहितले योग्य बर वा बधु प्राप्त गर्ने मान्यता रहिआएको छ ।
