मधेस प्रदेशमा अहिले सत्ता लोभका कारण राजिनामा दिएको मुख्यमन्त्री समेत पद छोडन चाहेको छैन भने प्रतिपक्ष दलहरु उनलाई पदच्यूत गर्न लागि परेको देखिन्छ । जेनजी आन्दोलनको पक्कै पनि यो मर्म थिएन । मधेस सहित समग्र देशलाई नयाँ नेपालको ढाँचामा ढाल्न सहादत प्राप्त जेनजी आन्दोलनको उद्देश्य कदापि मधेस प्रदेशमा देखिएको सत्ता लोभलाई उत्प्रेरित गर्नु थिएन ।
हिजोको इतिहास र आजको संघर्षको स्वरूप फरक भएता पनि लक्ष्य त नयाँ नेपाल सिर्जना गर्ने, राष्ट्रको रक्षा र भविष्यको उज्यालो किरणले देशलाई झकिझकाउ पार्ने नै हुनु पर्दछ । आज नयाँ पुस्ताको यो बलिदानले अवश्य पनि नयाँ नेपाल कोरिने देखिन्छ र पुराना पुस्ताले यसलाई सहयोग र समन्वय देखाउन अति आवश्यक रहेको देखिन्छ । फेरि पनि पुरानै ढिपी र स्वार्थभाव बोकेका अरिंगालको हातमा प्रदेश तथा देश नपरोस् । वास्तवमा भन्ने हो भने जेन–जीलाई असफल गर्ने काम कसैले नगरौं । जेन–जीका नाममा अबका दिनमा कसैले धमिलो पानीमा झैं माछा मार्ने काम नगरौं । सम्भावनाको बाटो देखाउनु नै हामी सबैको जिम्मेवारी र दायित्व रहेको देखिन्छ ।
अत्याचारले सीमा नाघेपछि निस्केका ती निर्देश सपनाहरूको हिजो र आजको लडाइँबीच केही फरक भए पनि लक्ष्य भने एउटै रहेको देखिन्छ । पार्टीगत भागबण्डा भन्दा पनि मधेस प्रदेशलाई सबल र आत्मनिर्भर बनाउन सक्ने व्यक्ति नेतृत्व पँक्तीमा आउन जरुरी रहेको देखिन्छ । मात्र ठुलो कुरा गरेर हुने रहेन छ । व्यवहारमा लागु गरी समग्र मधेसलाई चौतर्फी विकासको बाटोमा डोर्याउन सक्ने साहसी तथा निस्वार्थ व्यक्तिको खाँचो रहेको छ यहाँ । जेनजी समेतले अहिले आफ्नो सुझाव राख्न आवश्यक रहेको देखिन्छ ।
