आरजे इर्शाद शेख
महोत्तरी, १९ कार्तिक
मिथिलाञ्चलको ऐतिहासिक तथा सांस्कृतिक महत्व बोकेको सामाचकेवा पर्व आज बिसर्जनसहित उत्साहपूर्वक सम्पन्न गरिएको छ। परापूर्वकालदेखि निरन्तर मनाइँदै आएको यो पर्व मिथिला समाजमा भाई–बहिनीबीचको माया, स्नेह र एकताको प्रतीकका रूपमा मानिन्छ।
सामाचकेवा पर्वका अवसरमा दिदीबहिनीहरूले बाँसका डालामा रंगीन सजावट गरी माटोका रंगीचंगी मूर्तिहरू — जसमा समा, चकेवा, सतभैया, माली, चुगला आदि पात्रहरू समावेश हुन्छन् — सजाएर परम्परागत सामाचकेवा गीत गाउने गर्छन्। पर्वको अन्तिम दिनमा दिदीबहिनीहरूले दाजुभाईको दीर्घायु र सुख–समृद्धिको कामना गर्दै ती मूर्तिहरूलाई खेत वा चौरमा बिसर्जन गर्ने चलन छ।
धार्मिक मान्यताअनुसार, भगवान श्रीकृष्णकी छोरी सामा माथि अन्याय भएपछि उनका दाजु श्रीकृष्णले न्याय दिलाएका थिए। सोही घटनाको स्मरणमा सामा–चकेवा पर्व मनाउने परम्परा स्थापित भएको जनविश्वास छ।
स्थानीयहरूका अनुसार, यो पर्वले मिथिला समाजमा भाई–बहिनीबीचको सम्बन्धलाई अझ सुदृढ बनाउने कार्य गर्दै आएको छ। बिसर्जनसँगै यस वर्षको सामाचकेवा पर्व विधिवत् रूपमा सम्पन्न भएको छ।
