जलेश्वरटुडे समाचारदाता
महोत्तरी, १३ भाद्र
बिपी राजमार्ग अन्तर्गत काभ्रेको रोशी गाउपालिका वडा न.७ लास्कोटबेसीमा पहिरो संगै ढुंगा खस्दा मोटर साइकलमा सवार एक युवकको मृत्यु भएको छ ।काठमाण्डौं बाट जनकपुर तर्फ आउँदै गरेको ज. ८ प. ७४९० नम्बरको मोटरसाइकलमा सवार महोत्तरीको रामगोपालपुर वडा न.८ गोइठी बिर्ता बस्ने २८ वर्षीय सरोज साहको मृत्यु भएको छ भने जनकपुर रामानन्द चौक बस्ने ३० वर्षीय सतिस साह घाइते भएका छन् ।दुवै ढुंगा लागेर घाइते भएपछि धुलिखेल अस्पतालमा उपचारको क्रममा साहको मृत्यु भएको जिल्ला प्रहरी कार्यालय काभ्रेले जनाएको छ ।सडकको माथिबाट खसेको ढुंगा लागेर घाइते भएकालाई प्रहरीले उद्धारको लागि धुलिखेल अस्पताल लगेका थिए । मोटरसाइकल चालक साहको धुलिखेल अस्पतालमा उपचारको क्रममा मृत्यु भएको हो । घाइते साहको अवस्था सामान्य रहेको तथा थप उपचार भैरहेको प्रहरीले जनाएको छ । मृतक साह महोत्तरीको रामगोपालपुर नगरपालिकाको उप मेयर सीता साहको छोरा हुन् ।मृतक साहको शव लिन परिवारजन धुलिखेल तर्फ प्रस्थान गरिसकेको रामगोपालपुरका प्रमखु अशोक मण्डलले जनाएको छ ।
