मो. इर्शाद
महोत्तरी, २६ भाद्र
एकडारा गाउँपालिका–३ अजमरपट्टीस्थित श्री नेपाल राष्ट्रिय माध्यमिक विद्यालयले पहिलोपटक माध्यमिक शिक्षा परीक्षा (SEE) मा सहभागी भएर उत्कृष्ट शैक्षिक उपलब्धि हासिल गरेको भन्दै विद्यार्थी तथा शिक्षक–शिक्षिकालाई सम्मान गरिएको छ।
एकडारा गाउँपालिकाको शिक्षा शाखाको आयोजनामा शुक्रबार विद्यालय परिसरमा आयोजित कार्यक्रममा SEE मा उत्कृष्ट नतिजा हासिल गर्ने विद्यार्थी तथा उनीहरूको सफलतामा योगदान पुर्याउने शिक्षक–शिक्षिकालाई सम्मान गरिएको हो। कार्यक्रममा उत्कृष्ट विद्यार्थीलाई खादा तथा माला लगाएर सम्मान गर्दै बधाई तथा शुभकामना दिइएको छ।
विद्यालयका अनुसार पहिलोपटक SEE परीक्षामा सहभागी भएका कुल ३५ विद्यार्थीमध्ये २८ जना उत्तीर्ण भएका छन्। उत्तीर्ण विद्यार्थीमध्ये चार जनाले ४.० जीपीए प्राप्त गरेका छन्। विद्यालयले प्राप्त गरेको नतिजाका आधारमा एकडारा गाउँपालिकामा प्रथम, महोत्तरी जिल्लामा तृतीय तथा मधेश प्रदेशमा छैटौँ स्थान हासिल गर्न सफल भएको जनाएको छ।
सीमित स्रोतसाधनका बीच विद्यालयले पहिलोपटक SEE परीक्षामा प्राप्त गरेको यो उपलब्धिलाई विद्यालय प्रशासनले महत्वपूर्ण शैक्षिक सफलता भनेको छ। विद्यालयका प्रधानाध्यापकका अनुसार पर्याप्त आन्तरिक स्रोतसाधनको अभाव रहे पनि शिक्षकहरूको निरन्तर मेहनत, विद्यार्थीको लगनशीलता, अभिभावकको सहयोग तथा स्थानीय समुदायको सकारात्मक भूमिकाका कारण विद्यालयले उल्लेख्य प्रगति गर्न सफल भएको हो।
कार्यक्रममा सहभागीहरूले विद्यालयले हासिल गरेको उपलब्धिको प्रशंसा गर्दै विद्यार्थी तथा शिक्षकलाई बधाई दिएका थिए। सम्मान पाएपछि विद्यार्थीहरूमा थप उत्साह र आत्मविश्वास बढेको तथा आगामी दिनमा अझ राम्रो नतिजा ल्याउने प्रेरणा मिलेको विद्यालयले जनाएको छ।
स्थानीयवासी तथा अभिभावकले पनि सीमित स्रोतसाधनका बाबजुद विद्यालयले हासिल गरेको उपलब्धि प्रशंसनीय रहेको बताएका थिए। उनीहरूले विद्यालयको शैक्षिक गुणस्तरलाई अझ उकास्न स्थानीय तह, विद्यालय, शिक्षक, अभिभावक र समुदायबीच निरन्तर सहकार्य आवश्यक रहेकोमा जोड दिएका थिए।
पहिलोपटक SEE परीक्षामा सहभागी भएर गाउँपालिका, जिल्ला र प्रदेशस्तरमै उत्कृष्ट नतिजा हासिल गर्न सफल भएपछि अजमरपट्टीस्थित नेपाल राष्ट्रिय माध्यमिक विद्यालयमा उत्साह थपिएको छ। विद्यालय प्रशासनले आगामी दिनमा शैक्षिक गुणस्तरलाई अझ सुधार गर्दै प्राप्त उपलब्धिलाई निरन्तरता दिने लक्ष्य लिएको जनाएको छ।
सम्मान कार्यक्रममा एकडारा गाउँपालिकाका अध्यक्ष दीपनारायण मण्डल, स्वास्थ्य शाखा प्रमुख महेन्द्र मण्डल, वीरेन्द्र मण्डल, शिक्षा शाखाका प्रमुख, शिक्षक–शिक्षिका, विद्यार्थी तथा सञ्चारकर्मीहरूको उपस्थिति रहेको थियो।
