राकेश प्रसाद चौधरी
महोत्तरी,६ फागुन
महाशिवरात्रीको अवसरमा मधेश प्रदेशका मुख्यमन्त्री सरोज कुमार यादव, उद्योग, पर्यटन तथा वन मन्त्री सुनिता यादव लगायतले जलगुफाभित्र रहेको जलेश्वर महादेवको पुजापाठ गरेका छन् ।
गुफाभित्रको जल निकालिएको समयमा मुख्यमन्त्री लगायत मन्त्री एवं विशिष्ठ अतिथिहरूले जलेश्वर महालिङ्गको पुजापाठ गरेका छन् । नेपाली सेना तथा सशस्त्र प्रहरीले केही घण्टाको फरकमा दिनभर जल निकालेर दर्शनार्थीहरूलाई महादेवको पुजापाठ गर्न सहज बनाउन खटिएका छन् ।
मन्दिरमा आउने विशिष्ठ अतिथिहरूलाई जलेश्वर नगरपालिकाका मेयर सुरेश साह सोनारले स्वागत तथा सम्मान गरिरहेका छन् । जलेश्वर महादेवको दर्शनपछि मुख्यमन्त्री यादवले यस मन्दिरको बिकासका लागि प्रतिबद्धता ब्यक्त गरे । त्यस्तै उद्योग, पर्यटन तथा वन मन्त्री सुनिताले जलेश्वर महादेव मन्दिरसहितको क्षेत्रलाई उत्कृष्ट पर्यटकीयस्थल बनाउन स्थानीय पालिकासँग सहकार्य गर्ने आश्वासन दिइन् ।
भगवान शंकरले मयदानवको त्रिपुर भष्म गरेपछि ज्वाला उत्पन्न भएको थियो । स्वयं रुद्रले जलबाट ज्वालालाई शान्त गरि महालिङ्गको रुपमा स्थापना गरेको कारण जलेश्वर भएको धार्मिक ग्रंथहरूमा उल्लेख रहेको पुजारी उपेन्द्र पाठकले बताए । मिथिला महात्म्यममा यस महादेवलाई सिद्धिदायक भनेर समेत सम्बोधन गरिएको छ ।
