जलेश्वरटुडे समाचारदाता
जनकपुरधाम, ४ कार्तिक
सतिशकुमार सिंह नेतृत्वको मधेश प्रदेश सरकारले गएको भदौ २८ गते प्रदेश खेलकूद विधेयक २०८१ सर्वसवम्मले पारित गराए ।
खेलकूद विधेयक पारित भएको केही घण्टा नबित्दै खेलकूद तथा समाज कल्याण मन्त्री प्रमोद जयसवालले यसको जस लिन पत्रकार सम्मेलन नै गरे ।
उनले साढे ६ वर्षदेखि बन्न नसकेको खेलकूद सम्बन्धी ऐन बनाएको दावी गर्न छुटाएनन् ।
खेलाडी र प्रशिक्षकहरुले पनि प्रदेश सरकारको यो कार्यको प्रंशंसा गरे नै । तर, विधेयक पारित भएको महिना दिन बितिसके पनि कार्यान्वयनतिर सरकारले कुनै चासो लिएको देखिदैन् ।
अन्य प्रदेशहरुमा खेलकूद सम्बन्धी ऐनलाई टेकेर खेलकूद परिषद् समेत गठन भइसकेको अवस्थामा मधेशमा यसतर्फ सरकारले खासै चासो नलिदा खेलाडीहरुमा नैराश्यता बढ्दै गएको प्रशिक्षकहरुले गुनासो गरेका छन् ।
खेलकूद परिषद् गठन गरेर खेलाडीको प्रशिक्षण, खेलको वातावारण निर्माण गर्नुका साथै प्रशिक्षकहरु नियुक्त गर्नुपर्ने हो ।
यस वर्षको अन्त्यमा ११औं राष्ट्रिय खेलकूद कर्णाली प्रदेशमा हुन लागेको छ । यस वर्ष पनि मधेश प्रदेशले राम्रो प्रदर्शन गर्ने सम्भावना घट्दै गएको छ । पूर्वाधार र श्रोतसाधन अभावमा खेलाडीहरुले राष्ट्रिय खेलकूदमा पनि उत्कृष्ट प्रदर्शन गर्न सकेको छैन् । यसअघि पोखरामा सम्पन्न १०औं राष्ट्रिय खेलकूद प्रतियोगितामा संख्यात्मक रुपमा खेलाडीहरु बढी सहभागी भएपनि पदक जित्नमा सफल हुन सकेको थिएन् ।
पूर्वाधार र श्रोतसाधन अभावमा खेलाडीहरुले अपेक्षित प्रदर्शन गर्न नसकेको प्रशिक्षकहरुको तर्क छ ।
अहिलेसम्म तयारी सुरु भइसक्नुपर्ने थियो, भलिवलका राष्ट्रिय प्रशिक्षक भरत यादवले भने–तर, सरकारले कुनै चासो राखेको छैन् ।
प्रदेशको प्रतिनिधित्व गर्दै देश र विदेशमा उत्कृष्ट गरेका खेलाडीहरुको प्रदेश सरकारले कहिल्यै खोजखबरसमेत लिएको छैन् ।
खेलाडी के कस्तो अवस्थामा छ, प्रदेश सरकारलाई कुनै मतलब छैन् । ट्रफी जितेर ल्याउनुसित मात्र मतलब रहेको छ, उनले भने–यसको लागि गर्नुपर्ने सहयोगबारे सरकार अनभिज्ञ छ ।
प्रदेश सरकारको बेवास्ताका कारण मधेशका खेलाडीहरु अगाडि बढ्न नसकेको उनले दावी गरे ।
खेल र खेलाडीप्रति वर्तमान प्रदेश सरकारको रबैया सकारात्मक नरहेको उनले दावी गरे ।
यादव प्रशिक्षक रहेको महिला भलिवल टोलीले काठमाण्डौमा सम्पन्न प्रतियोगितामा भारतीय महिला टोलीलाई पहिलो पटक पराजित गरेको थियो । यादवको रेखदेखमा महिला भलिवल टोलीले हासिल गरेको सफलताबाट प्रभावित भएर काठमाण्डौ महानगरपालिकाका मेयर बालेन साहले खेलाडी र प्रशिक्षकहरुलाई जनही एक÷एक लाख नगद प्रदान गरेर सम्मानित गरे । केही दिन नबित्दै संघीय सरकारले पनि जनही दुई÷दुई लाख दिएर सम्मान गरेका थिए ।
मधेशका प्रशिक्षक अन्य प्रदेशमा सम्मानित भइरहदा आफ्नै प्रदेशमा बञ्चित छन् ।
मधेश प्रदेशका क्रिकेट खेलाडीहरुले केपी ओली कप जितेर ल्याएपछि पुरस्कारवापत पाउनुपर्ने नगद पाँच लाख सतिशकुमार सिंह नेतृत्वको सरकारले दिन सकेको छैन् ।
मुख्यमन्त्री सिंहसहित खेलकूद तथा समाज कल्याण मन्त्री जयसवाल र निमित्त सचिव चुडामणि फुयाललाई पटक पटक ताकेता गरेपनि उक्त रकम उपलब्ध गराउन चासो लिएका छैनन् ।
विगतको सरकारले घोषणा गरेर नदिएकाले आफूहरुलाई दिन समस्या भएको मुख्यमन्त्री सिंहले बताए ।
उक्त रकमका लागि अहिलेसम्म कागजातहरु समेत नभेटेकाले रकम तत्काल उपलब्ध गराउन मुस्किल रहेको सिंहले बताए ।
उक्त रकमका लागि खेलकूद मन्त्रालयमा बजेट छ÷छैन, मन्त्रीज्यूसित छलफल गरेपछि मात्रै केही भन्न सकिने सिंहले जानकारी दिए ।
सरोजकुमार यादवले घोषणा गरेको केही दिन नबित्दै तत्कालीन शिक्षा तथा समाज कल्याण मन्त्रालय फुटेका कारण उक्त रकम खेलाडीहरुलाई उपलब्ध गराउन सकिएको थिएन् ।
शिक्षा तथा संस्कृति मन्त्रालय र खेलकूद तथा समाज कल्याण मन्त्रालय बनाएपछि खेलाडीले पुरस्कार स्वरुपको रकम पाउन सकेको थिएन् ।
वर्तमान सरकारले पनि उक्त रकम दिन सकारात्मक नदेखिएको मधेश प्रदेश क्रिकेट संघका सचिव आयुश श्रेष्ठले बताए ।
सचिवज्यूले माग्नुभएको आवश्यक कागजातहरु बुझाइसकेपनि हालसम्म रकम भने उपलब्ध नगराएको सचिव श्रेष्ठले थपे ।
मन्त्री र सचिवज्यूसित पटक पटक कुराकानी भएपनि प्रक्रिया भने अगाडि बढन नसकेको उनले जानकारी दिए ।
मधेश प्रदेशमा खेल र खेलाडीको अवस्था यसैबाट छर्पस्ट हुन्छ, उनले भने ।
