जलेश्वरटुडे समाचारदाता
जनकपुरधाम, १८ जेष्ठ
धनुषाको शहीदनगर नगरपालिका वडा नं. ९ गोठकोयलपुरमा परिवर्तनका संवाहक किशोरीहरुले लैंगिक असमानता र बालश्रम विरुद्ध सडक नाटक प्रदर्शन गरेकी छन् ।
प्लान इन्टरनेशनल नेपाल र सपोर्ट नेपालको साझेदारीमा शहीदनगर नगरपालिका–९ मा संचालित बालिका सशक्तिकरण परियाजना अन्तर्गत परिवर्तनका संवाहक (सीओसी) कक्षाका किशोरीहरुले छोरा र छोरीबीचको विभेद र बालश्रम विरुद्ध सडक नाटक प्रदर्शन गरेका हुन् । महिला, किशोर किशोरी, बालबालिकाहरुको उपस्थितिमा गरिएको उक्त सडक नाटकमार्फत सामाजिक विकृति विरुद्ध अभियानको आवश्यक्ता औंल्याएको थियो ।
किशोरीहरुले छोरा र छोरीबीचको विभेद र बालश्रमका कारण बालबालिकाहरु आफ्नो अधिकारबाट बञ्चित हुनुपरेको सन्देश नाटकमार्फत दिन खोजिएको सपोर्ट नेपालका फिल्ड सुपरभाइजर इशा राउतले बताइन् ।
नाटकमार्फत बाल श्रमको बिगबिगी, त्यसका भयानक प्रभाव, बाल विवाहका सम्भावित कारण, त्यसबाट निम्तिने पारिवारिक, सामाजिक तथा कानुनी समस्या लगायतका कुरामा सचेतना दिने काम भएको र त्यस्ता विषयहरूमा सरोकारवाला निकाय तथा सर्वसाधारण जनतालाई संवेदनशील बनाउन मद्दत पुग्ने राउतले बताइन् ।
यस्ता सडक नाटकले लैंगिक विभेद, बालश्रम कम गर्न टेवा पुग्ने विश्वास व्यक्त गरे । उनले नाटकमा सहयोग गरेको भन्दै परिवर्तनका संवाहक किशोरीहरुमा धन्यवाद समेत व्यक्त गरिन् ।
