जलेश्वरटुडे समाचारदाता
जनकपुरधाम, २३ आषाढ
धनुषालाई पूर्ण खोप सुनिश्चितता तथा दिगोपना जिल्ला घोषणा गरिएको छ । ’खोप निशुल्क पाइन्छ, खोप सुरक्षित हुन्छ खोपले जीवन रक्षा गर्छ भन्ने नाराका साथ धनुषालाई स्वास्थ्य निर्देशनालयका निर्देशक सरोजचन्द्र न्यौपानेले पूर्ण खोप सुनिश्चितता तथा दिगोपना जिल्ला घोषणा गरेका हुन् ।
जिल्ला खोप समन्वय समितिका अध्यक्षसमेत रहेका जिल्ला समन्वय समिति धनुषाका प्रमुख राजनन्दन मण्डलको अध्यक्षतामा भएको कार्यक्रममा निर्देशक न्यौपानेले घोषणा पत्र हस्तान्तरण गरे । घोषणा कार्यक्रममा स्वास्थ्य तथा जनसंख्या मन्त्री सत्रुधन प्रसाद सिंहले उत्साह र उमङ्गका साथ काम गरेकोले पूर्ण खोप सुनिश्चितता बनाउन सकिएको र यसलाई निरन्तरता पाउनु ठुलो विषय भएकोले आगामी दिनमा पनि अभियानकै रूपमा सञ्चालन गर्न आवश्यक रहेको बताए ।
सो अवसरमा मन्त्री सिंहले खोप सुनिश्चितता घोषणा गर्न सहयोग गर्ने कर्मचारीलाई धन्यवाद दिँदै खोपले बालबालिकामा विभिन्न रोगबाट बच्ने प्रतिरोधात्मक क्षमता बढ्ने भएकाले.खोपबाट बालबालिकालाई वञ्चित गराउन नहुने बताए ।
स्वास्थ्य तथा जनसंख्या मन्त्रालयका सचिव डा. प्रमोदकुमार यादवले मधेशका जिल्लाहरुलाई पूर्ण खोप सुनिश्चितता घोषणा गर्न सकिदैन भने आशंकालाई चिर्दै धनुषा लगायतका जिल्लाहरुले आशंकालाई गलत साबित गरेको बताए । विगतमा खोप भण्डारणको व्यवस्था नहुँदा ढुवानीमै ठूलो रकम खर्चिनु पर्ने बाध्यता थियो, डा. यादवले भने–अहिले भने यस्ता बाध्यताहरुलाई प्रदेश सरकारले समाधान गरेको छ । प्रदेश सरकारले आफ्नै खोप भण्डारण गृह निर्माण गरेर संचालनमा ल्याएपछि हेटौडा, विराटनगर लगायतको स्थानबाट ढुवानी गर्नुपर्ने बाध्यता हटेर गएको उनको तर्क थियो ।
स्वास्थ्य निर्देशनालयका निर्देशक न्यौपानेले स्वास्थ्य क्षेत्रमा क्रमिक रुपमा सुधार हुँदै गएको जिकिर गर्दै मधेश प्रदेश पूर्ण खोप सुनिश्चितता घोषणा हुनु यसकै उदाहरण रहेको बताए । यसमा स्वास्थ्यकर्मीहरुको योगदान महत्वपूर्ण रहेकाले आगामी दिनमा पनि खोप कार्यक्रमलाई प्रभावकारी रुपमा संचालन गर्न निर्देशक न्यौपानेले आग्रह गरे ।
सबै वडालाई पूर्ण खोप सुनिश्चितता घोषणा गरिएको र हाल सोही तथ्याङ्क र सूचकका आधारमा पूर्ण खोप सुनिश्चितता जिल्ला घोषणा गरिएको स्वास्थ्य कार्यालय धनुषाका प्रमुख उमेश यादवले बताए ।
राष्ट्रिय खोप तालिका अनुसार जिल्लाका १८ वटै पालिकाको १६९ वटा वडाका खोप लगाउने उमेर समूहका बालबालिकाले खोप लगाएको सुनिश्चित गरिएपछि पूर्ण खोपयुक्त सुनिश्चित जिल्ला घोषणा गरिएको यादवले बताए ।
जिल्लाले दिगोपना र पूर्ण खोप सुनिश्चितताका लागि हरेक वर्ष नियमित खोपको घरभेट सर्वेक्षण गर्ने उमेर अनुसार खोप पाएनपाएको यकिन गरेर खोप लगाउन छुटेको पाइएमा वैशाख महिनामा खोप दिने व्यवस्था गरेको छ । प्रत्येक वडामा वडास्तरीय खोप समन्वय समितिले बालबालिकाले खोप लगाएको सुनिश्चित गरेपछि पालिका हुँदै जिल्लालाई पूर्ण खोपयुक्त जिल्ला सुनिश्चितता घोषणा गरिएको यादवले जानकारी दिए ।
