जलेश्वरटुडे समाचारदाता
जनकपुरधाम, २९ भाद्र
जेनजी युवाको प्रदर्शनको क्रममा तोडफोड र आगजनीबाट क्षतिग्रस्त भएको मुख्यमन्त्री तथा मन्त्रिपरिषद्को कार्यालयलाई मधेश भवनको कभर्डहलमा सार्ने तयारी गरिएको छ ।
साबिकको जनकपुर चुरोट कारखाना लि. को गेट नम्बर १ मा अवस्थित मुख्यमन्त्री तथा मन्त्रिपरिषद्को कार्यालयमा अहिले काम गर्न सक्ने अवस्था नरहेकाले तत्कालका लागि खेलकूद तथा समाज कल्याण मन्त्रालयमातहत रहेको कभर्डहलमा सार्ने तयारी गरिएको मन्त्रालय श्रोतले जनाएको छ ।
‘मुख्यमन्त्री तथ मन्त्रिपरिषद्को कार्यालय भवन मर्मत नहुन्जेल कभर्डहलबाट काम गर्ने गरी व्यवस्थापन थालिएको हो ।
मुख्यमन्त्री तथा मन्त्रिपरिषद्को कार्यालय कभर्डहलमा सार्नका लागि आइतबार कर्मचारीहरुले सरसफाई गरेका छन् । केही दिन अघि मात्र खेलकूद तथा समाज कल्याण मन्त्रालयले कभर्डहलको मर्मतसम्भार र रंगरोगन गरेका थिए ।
भुईमा टाइल्स प्रयोग गरिएको छ, कोठाहरुको रंगरोगन पूरा भइसकेको छ, एक जना कर्मचारीले भने– तत्काल यहाँबाट मुख्यमन्त्रीको कार्यालय संचालन गर्न सकिन्छ ।
मुख्यमन्त्री तथा मन्त्रिपरिषद्को कार्यालय तत्काल पुनः संचालनमा ल्याउने सक्ने अवस्था नरहेकाले कभर्डहलबाट प्रशासनिक कार्य गर्ने गरी तयारी भइरहेको प्रमुख सचिव मदन भुजेलले बताए ।
प्रशासनिक भवनसँगै टाँसिएको किताब खाना पनि क्षतिग्रस्त भएको अवस्था छ, भुजेलले भने–जुन तत्काल पुनः संचालनमा ल्याउन सक्ने अवस्था छैन् ।
त्यसैले तत्कालका लागि कार्यालयलाई सारेर भए पनि संचालनमा ल्याउने तयारी गरिएको भुजेलले बताए ।
भदौ २३ गतेदेखि सुरु भएको जेनजी युवाको प्रदर्शनको क्रममा भदौ २४ गते प्रदर्शनकारीले मुख्यमन्त्री तथा मन्त्रिपरिषद्को कार्यालयमा तोडफोड र आगजनी गरेको थियो ।
मुख्यमन्त्री कार्यालयका भुइतल्लाको अधिकांश फाँट क्षतिग्रस्त बनेको छ । कागजातहरु जलेकोबारे अहिले नै यकिन गर्न सक्ने अवस्था नरहेको कार्यालयले जनाएको छ ।
प्रदर्शनकारीले कार्यालय परिसरमा रहेका सवारीसाधनहरुमा पनि आगजनी गरेका थिए । मुख्यमन्त्री कार्यालयसहित प्रदेश सरकारको आधा दर्जन मन्त्रालयहरुमा तोडफोड र आगजनी गर्दा क्षतिग्रस्त भएको छ । कर्मचारीहरुको क्वार्टरमा पनि तोडफोड गर्नुका साथै सवारीसाधनहरुमा पनि आगजनी गरेको थियो ।
