जलेश्वरटुडे समाचारदाता
महोत्तरी, १५ आषाढ
महोत्तरीको पिपरा गाउँपालिकामा पूर्णखोप सुनिश्चितता घोषणा गरिएको छ । जन्म देखि २ बर्षसम्मको बालबालिकाले पूर्णखोप पाएको सुनिश्चितता भएपछि सो घोषणा गरिएको हो ।
‘पूर्णखोप सुरक्षित भविष्य’ भन्ने मूल नारासहित गाउँपालिकालाई पूर्णखोप सुनिश्चितता तथा दिगोपना पालिकाको रूपमा घोषणा गरिएको हो । राष्ट्रिय खोप तालिका अनुसार तोकिएका उमेर समूहका बालबालिकाहरूले सबै खोपको मात्रा पूरा गरेका थिए ।
खोप निर्देशिका अनुसार आवश्यक सबै प्रक्रियाहरू पूरा गरेर गाउँपालिकालाई पूर्णखोप सुनिश्चितता दिगोपना गाउँपालिकाको रूपमा घोषणा गरिएको स्वास्थ्य शाखा उपप्रमुख रंधिर यादवले बताउनुभयो । बालबालिकाहरूले पोलियो, दादुरा रुबेला, डिपीटी, जापानीज इन्सेफ्लाइटिस, रोटा भाइरस, निमोनिया टाइफाइडलगायत रोगहरूको विरुद्धमा पाउनुपर्ने विभिन्न प्रकारका खोपको सबै मात्रा पूरा गरेको उहाँको भनाइ छ ।
पिपरा गाउँपालिकाका अध्यक्ष रामजानकी यादवले ‘पूर्णखोप पाउनु बालबालिकाहरुको नैसगिंक अधिकार हो’ लेखिएको व्यानर वाचनसहित प्रतिबद्धता जनाउँदै आगामी दिनमा पनि गाउँपालिकालाई पूर्णखोप सुनिश्चिता कायम गराउने बताउनुभयो ।
स्वास्थ्य शाखा प्रमुख बिरेन्द्र यादवले जानकारी गराए अनुसार यस पाली पूर्णखोप सुनिश्चितता गरेर मात्र नभइ पूर्ण खोपको दिगोपनामा जोड दिनुभएको थियो…. लगायत पिपरा जनता अस्पतालबाट भिडियो एक्सरे, 500 MA को DR digital x-ray, 24 घण्टे इमर्जेन्सी तथा बर्थिङ, प्रयोगशाला सेवा सन्चालन भैसकेको हुनाले उक्त सेवा लिन सम्पुर्ण पालिकावासी लाई अनुरोध समेत गर्नु भएका थिए
कार्यक्रममा पिपरा गाउँपालिकाका उपाध्यक्ष बन्दना पाण्डे, वडा अध्यक्ष, स्वास्थ्य कार्यालय महोत्तरीको खोप अधिकृत दिपेन्द्र राय र भोला पण्डित,पालिका भित्र कार्यरत सम्पुर्ण स्वास्थ्यकर्मी,कर्मचारी तथा महिला सामुदायिक स्वास्थ्य स्वयम् सेविकालगायतको उपस्थिति रहेको थियो।
